*ಕಿತ್ತೂರ ಕನ್ನಡತಿ**
ವೀರರಾಣಿಯ ಕಥೆಯ ಕೇಳಿರಿ
ಕನ್ನಡ ನಾಡಿನ ಮಕ್ಕಳೇ
ಕಿತ್ತೂರಿಗಾಗಿ ಹೋರಾಡಿ ಮಡಿದ
ರಾಣಿಯ ಕಥೆಯ ಹಾಡಲೇ...||
ಮಲ್ಲ ಸರ್ಜನಿಗೆ ಕಿರಿಯ ರಾಣಿಯು
ವೀರಮಾತೆ ನಮ್ಮ ಚೆನ್ನಮ್ಮ
ನಾಡ ರಕ್ಷಣೆಗೆ ನಿಂತರಾಣೆಯು
ಕೆಚ್ಚೆದೆಯ ಕಲಿಯು ನಮ್ಮಮ್ಮ ||
ಕೆಂಪು ಕೋತಿಗಳೇ ತೊಲಗಿ ಎನ್ನುತ
ಸಿಡಿಲಿನಂತೆ ಗುಡುಗಿದಳು
ಕನ್ನಡ ನಾಡಿನ ಗರಿಮೆಯ ಸಾರಲು
ಬಿಳಿಯರ ಹುಟ್ಟಡಗಿಸಿದಳು ||
ಸಂಗೊಳ್ಳಿ ರಾಯಣ್ಣ ಬಾಳಪ್ಪರಂಥ
ವೀರರ ಪಡೆಯಿತು ಕಿತ್ತೂರು
ಆಂಗ್ಲರ ಸೊಕ್ಕಿಗೆ ಕೊಳ್ಳಿಯನಿಟ್ಟ
ಯೋಧರ ನಾಡು ನಮ್ಮೂರು ||
ಖಡ್ಗ ಬೀಸುತ ಛಲದಿ ನುಗ್ಗುತ
ವೈರಿಯ ನೆತ್ತರು ಹರಸಿದರು
ದುಷ್ಟ ಜನಗಳ ದುಷ್ಟ ಬುದ್ಧಿಗೆ
ಸೋಲನು ಪಡೆದು ಮರುಗಿದರು ||
ಕಿತ್ತೂರ ರಾಜ್ಯವ ಕಟ್ಟುವ ಛಲವ
ಸೆರೆಮನೆ ವಾಸದಿ ಬಿಡಲೇ ಇಲ್ಲ
ಮಾತುಗಳೆಲ್ಲ ಕಿಡಿಯಂತಾದವು
ಹೋರಾಟವನ್ನು ಮುಗಿಸಲೇ ಇಲ್ಲ ||
ಕನ್ನಡ ನಾಡಿನ ರಕ್ಷಣೆಗಾಗಿ
ಬದುಕಿನ ಅರ್ಪಿತ ಕನ್ನಡತಿ
ಕನ್ನಡ ನಾಡಿನ ಕಲಿಗಳಿಗೆಲ್ಲಾ
ಸ್ಪೂರ್ತಿಯ ಜ್ಯೋತಿ ಕನ್ನಡತಿ ..||
=> ವೆಂಕಟೇಶ ಚಾಗಿ
ಕಾಮೆಂಟ್‌ಗಳಿಲ್ಲ:
ಕಾಮೆಂಟ್‌ ಪೋಸ್ಟ್ ಮಾಡಿ