*ಕನ್ನಡದ ತೇರು***
ಅಗೋ ನೋಡು
ಸಾಗುತಿಹುದು ಕನ್ನಡದ ತೇರು
ಕನ್ನಡಿಗರು ಹೆಮ್ಮೆಯಿಂದ
ಎಳೆಯುತಿರುವ ಕನ್ನಡದ ತೇರು ||ಪ||
ಜಾತಿ ಮತ ಭೇದ ಭಾವ
ಎನ್ನೋ ಮಾತೇ ಇಲ್ಲ
ಪ್ರೀತಿ ಪ್ರೇಮ ಸಹಕಾರ
ಒಂದೆ ಮಂತ್ರ ಎಲ್ಲ
ಜಗದೆಲ್ಲೆಡೆ ಕನ್ನಡದ ಕಂಪು ಹರಡುತಿರಲು
ಸಾಗುತಿಹುದು ನಮ್ಮೆಲ್ಲರ ಶಾಂತಿದೂತ ತೇರು ||
ಕೃಷ್ಣ ತುಂಗೆ ಕಾವೇರಿ
ನಮ್ಮ ಜೊತೆಗೆ ಇರುವರು
ಸಂತಸದಿ ಹಾಡುತಿಹವು
ಪ್ರಾಣಿ ಪಕ್ಷಿ ಕೋಗಿಲೆಗಳು
ತಂಗಾಳಿಯ ಕಂಪಿನಲ್ಲೂ ಕನ್ನಡವೇ ತುಂಬಿ
ಹೆಮ್ಮೆಯಿಂದ ಸಾಗುತಿಹುದು ಕನ್ನಡದ ತೇರು ||
ಬಾದಾಮಿ ಬೆಳಗೋಳ
ಹಂಪೆಗಳಂತ ಸ್ಥಳಗಳು
ಸಾವಿರಾರು ವೀರಜನರ
ಇತಿಹಾಸವ ಸಾರುತಿಹವು
ಕವಿಪುಂಗವ ಸಾಧುಸಂತ ಸಾಧನೆಯ ಶಕ್ತಿಯಲ್ಲಿ
ಸಾಗುತಿಹುದು ಕನ್ನಡಿಗರ ಶ್ರೀಗಂಧದ ತೇರು ||
ಹಳೆಗನ್ನಡ ನಡುಗನ್ನಡ
ಹೊಸಗನ್ನಡ ಇಕನ್ನಡ
ಸಾಹಿತ್ಯವು ಸಾಗಿದಂತೆ
ಪ್ರಗತಿಯಾಯ್ತು ಸವಿಗನ್ನಡ
ಮಣ್ಣ ಕಣದಕಣದಲಿ ಹಸಿರು ಗಿರಿಯ ಕಂಪಲಿ
ಹೆಮ್ಮೆಯಿಂದ ಸಾಗುತಿಹುದು ಕನ್ನಡಿಗರ ತೇರು ||
ವೆಂಕಟೇಶ ಚಾಗಿ
ಕಾಮೆಂಟ್‌ಗಳಿಲ್ಲ:
ಕಾಮೆಂಟ್‌ ಪೋಸ್ಟ್ ಮಾಡಿ